Архитектур сонирхогчид, уншигчиддаа зориулан түүхийн мэдлэг олгох зорилгоор улс орны архитектурын түүхийн талаарх нийтлэлийг цувралаар хүргэж байгаа билээ.
Бароко хэв маяг нь сүр хүчит хэлбэртэй, өндөр төвшний цогц чимэглэлийг агуулсан, театрын өнгө төрхтэй, 17-р зуунд Италид бий болж Герман болон Европт хүчтэй тархсан архитектурын урсгал юм. Оргил үедээ 1625-1675 оны үед хүрсэн бөгөөд Португали, Испанийн колоничлолын үед өмнөд Америкт хүртэл тархсан байна. Чимэглэлийг нь улам нарийн болгосон хэлбэрийг нь Рококо гэх бөгөөд төв Европт түлхүү хөгжив.
Архитектурын гол онцлог нь сэргэн мандалтын үеийн архитектураас өвлөн үргэлжлүүлсэн бөмбөрцөг орой, колонад /баганан цуваа/ бөгөөд түүнийг улам өндөрт, нарийн хийцтэй, сүр жавхлант, давтагдашгүй уран чимэглэлтэй, сонгодог театрын хэлбэртэй болгосонд оршино. Мөн бөмбөрцөг оройгоор дамжин сүлжилдэх байгалийн гэрэлтүүлэг, түүний тусламжтайгаар улам тодрох бөмбөгөр оройн уран зургууд байна. Уран зураг, уран баримлууд нь тус бүрдээ өөрийн онцлогтой бөгөөд хоорондоо уялдан бүлэг үүсгэж мөн өөрийн онцлог илэрхийлэлтэй багц бүтээл болно. Уран зураг, уран баримал нь оюун санааны зориулалтаар мөн уран барилгад нэгдэх ба энэ нь дундад зууны Европын архитектурын хамгийн том онцлог шинж болно.
Барилгын материалд чулууны шинж чанарыг чухалчилан харуулна. Мушгиа хэлбэрийн эрчлээт баганууд нь тэнгэр өөд тэмүүлж буйг илэрхийлнэ. Архитектурын деталь хэсгүүд, чимэглэлүүдийг тус бүрийг нь салган үзвэл өөр өөрийн зохиомж, уран хийцтэй боловч тэдгээр нь хоорондоо нийцэж нэгдмэл нэг зохиомж болох ба барилгын их бие, бүтэн хэлбэрийг улам тодруулна. Өөрөөр хэлбэл дээрх бүх элементүүд хоорондоо уялдах бөгөөд хамгийн жижиг хэсэг ч цогц төлөвлөлтийн нэг хэсэг байхаар тусгагдсан байна. Ингэхдээ барилгын харагдац, хүний харааны орон зайг алслалттай уялдуулан харьцаа, масштабыг сонгоно. Энэ нь чимэглэл бол архитектурын гутамшиг гэж үздэг орчин үеийн архитектурын зарим урсгалаас эрс ондоо төлөвлөлтийн зарчим бөгөөд хоёрын хооронд чимэглэх бус хийц, деталь хэсгийг дан чимэглэлийн болон давхар бүтээцийн зорилгоор цогц төлөвлөх архитектур юм. Ингэхдээ экстерьерийн гоо зүйн хэмжээнд интерьер дизайныг урлан бүтээнэ. Зарим барилгад гаднах хэв шинжид нь сонгодог болон сэргэн мандалтын өнгө төрх давамгайлсан мөртлөө интерьерт бароко хэв давамгайлна. Дээрх жишээг Ватиканы гол сүмээс /st Peter’s basilica/ болон Парисын дуурийн театраас/ Paris opera house/ харж болно. Ёслолын сүрлэг шат нь дотор орон зайн төвд байрлана.
Санта Мариагийн сүм /Santa Maria della Salute/
1631-1687 онд Италийн Венецэд сүндэрлэсэн сүмийн зориулалттай барилга бөгөөд гранд каналын төгсгөл хэсэгт байрлана. Том жижиг 2 бөмбөрцөг оройтой ба том нь усан сувгийн нүүрэн талын архитектурын чуулбарын гол зохиомж болно. Гол орой байрлах их танхим нь 8 талтай бөгөөд энэ нь тал бүрээс сүмийг сүрлэг харагдуулах ч гол орцтой хэсгийг хэмжээ, чимэглэлээр илүү тодотгоно. Бөмбөгөр орой, дугуй, бөөрөнхий хэлбэрийн деталь хэсгүүд голлож гурвалжин орой туслах зохиомжийн үүрэг гүйцэтгэх Бароко хэв маягийн онцлогийг бүрэн агуулна. Бөмбөгөр оройг 2-р давхраас ороомог хэлбэрийн деталь /волют/ хэсгээр 1-р давхартай холбож уусгана.
Агаарын зураг
Дотор орон зайг харуулсан загвар
Шөнийн зураг
Деталь харуулсан зураг
Звинжер цогцолбор
Энэхүү музей, галерейн цогцолбор нь 1710-1728 онд анх дээдсийн харшийн зориулалтаар архитектор Матюс Даниел Попелман, уран барималч Балтазар Пермосер нарын удирдлагаар Германы Дрезен хотод баригдаж байсан бөгөөд дайны явцад хэд хэдэн удаа сүйдсэнээс дэлхийн 2-р дайны дараа ихэнх хэсэг нь нуран эвдэрсэн байна. Цогцолборын фото зураг болон бусад эх сурвалжууд бүрэн бүтэн байсны үр дүнд дахин сэргээжээ.
Нэг барилга бус цогцолбор төлөвлөлтөөрөө хамгийн алдаршсан Бароко архитектурын сонгодог жишээ юм. 6 үзэсгэлэнгийн танхим тэдгээрийг холбосон галерей хэлбэрийн хонгилтой. Барилгуудад чулуунаас гадна төрөл бүрийн материал, чимэглэл ашигласан ба тэдгээрийг нэг хэв загварт оруулан төлөвлөхөд дугуй хэлбэрийн аркан оройтой цонх, балюстр /хашлагын босоо сонгодог хэлбэрийн холбоос/, ижил өнгийн дээвэр чухал үүрэг гүйцэтгэжээ.
Задгай талбайн усан оргилуур нь Европ тивд дээгүүрт тооцогдох өндөр зэрэглэлийн ландшафтын элемент юм.
Агаарын зураглал
Харагдах байдал
Бусад жишээ
Христийн нийгэмлэгийн сүм/Church of the society of the Jesus/
1668 Тухайн үеийн Инк, одоогийн Перугийн нутаг
Парисын дуурийн театрын гол шат/Paris opera house grand stair 1875 он
Ховард Кастль харш/Castle Howard/, Англи, 1810 он
Луврын ордны баруун жигүүр/Louvre palace, western wing. Цагны павьлон /Clock pavilion/ 1850 он, Франц
Карлскирче сүм /Karlskirche/, Австри, Вени 1737 он
Тольт танхим /Hall of mirrors, Версалийн ордон /Versailles/, Франц 17-р зуун
